زندانیان زندان مرکزی زابل شکنجه می‌شوند
۸صبح، زابل: یک منبع محلی در ولایت زابل می‌گوید که در زندان مرکزی این ولایت، طالبان با کسانی که به اتهام جرایم جنایی بازداشت شده‌اند، خشونت می‌کنند.
براساس معلومات این منبع، در جریان وقت نظارت و انجام تحقیقات، به متهمان آب و نان داده نمی‌شود و هم‌چنان آنان به‌گونه شدید شکنجه می‌شوند.
از سوی دیگر برخی از زندانیان محبس مرکزی ولایت زابل نیز می‌گویند که طالبان در جریان بازداشت آن‌ها شکنجه کرده و با آنان رفتار خشونت‌بار داشته‌اند.
به گفته این زندانیان، طالبان برای آنان آب آلوده و غذای باقی‌مانده را می‌دهند و ضرورت‌های اولیه آنان تامین نمی‌شود.
ده‌ها تن که از سوی طالبان به اتهام‌های گوناگون از بخش‌های مختلف زایل بازداشت شده‌اند، در زندان مرکزی این ولایت نگهداری می‌شوند و هنوز به دوسیه‌های بخش زیادی از آنان رسیده‌گی نشده است.
