دیدار مقام‌های امریکایی و تاجیکستانی؛ امنیت مرزهای افغانستان و تاجیکستان مورد بحث قرار گرفت

۸صبح، کابل: یک مقام ارشد نظامی امریکا در یک سفر دو‌روزه به تاجیکستان آمده و در دیدار با رییس جمهور این کشور، در مورد تامین امنیت مرز افغانستان ـ تاجیکستان گفت‌وگو کرده است.

خبرگزاری اسپوتنیک گزارش کرده که جنرال مایکل کوریلا، فرمانده سنتکام، به امام‌علی رحمان، رییس جمهور تاجیکستان، گفته که امریکا آماده است نیروهای امنیتی تاجیکستان را برای دفاع از مرزهای آن کشور آموزش دهد و تجهیز کند.

این مقام نظامی امریکایی با شماری از مقام‌های ارشد امنیتی تاجیکستان نیز درباره مسایل مهم امنیتی، از جمله بهبود امنیت مرزهای این کشور، گفت‌وگو کرده است. این دیدارها سه روز پیش انجام شده است.

جنرال کوریلا امنیت مرزهای تاجیکستان را حیاتی خوانده و گفته است که مرزهای مستحکم تاجیکستان برای امنیت کل آسیای مرکزی حیاتی است.

هم‌چنان به نقل از کوریلا گفته شده است که همکاری امنیتی با نیروهای امنیتی تاجیکستان بر مبارزه با تروریسم و عملیات‌های امنیتی مرزی متمرکز است.

به گفته وی، نیروهای ویژه امریکایی تجارب خویش در بخش مبارزه با تروریسم را با نیروهای تاجیکستان در میان می‌گذارند.

قرار است امریکا تاجیکستان را در بخش‌های نصب حسگرهای زمینی، تجهیزات مخابراتی و وسایط گزمه مرزبانان، همکاری کند.

این در حالی است که چندی پیش نماینده ویژه امریکا برای افغانستان نیز در سفری به تاجیکستان با مقام‌های این کشور دیدار و گفت‌وگو کرده بود.

توماس ویست گفته بود که نگرانی‌های تاجیکستان در مورد امنیت مرز این کشور با افغانستان قابل درک است.

پس از تسلط طالبان بر افغانستان، چندین‌ بار گزارش شد که از خاک افغانستان اهدافی در تاجیکستان هدف قرار گرفته است.

دکمه بازگشت به بالا