سازمان ملل: اخراج پناهجویان افغانستان از تاجیکستان نگران کننده است

۸صبح، کابل: کمیساری عالی پناهنده‌گان سازمان ملل «UNHCR» از اخراج پناه‌جویان افغانستان توسط مقامات حکومت تاجیکستان ابراز نگرانی کرده است. 

براساس معلومات این نهاد، در یازدهم نوامبر، ۱۱ مرد، زن و کودک افغان که در تاجیکستان پناهنده بودند، پیش از بررسی در مورد ادعای پناهنده‌گی و حمایت، به افغانستان بازگردانده شدند.

کمیساری عالی پناهنده‌گان سازمان ملل هم‌چنین نگران افزایش موانع برای شهروندان افغانستان در تاجیکستان است.

معلومات این نهاد نشان می‌دهد که در پایان ماه جولای سال روان میلادی، مقام‌های محلی تاجیکستان صدور مجوز اقامت برای همه شهروندان افغانستان تازه وارد را به حالت تعلیق درآورده‌اند.

افزایش محدودیت‌ها و تعلیق بررسی پرونده‌های پناهنده‌گی در تاجیکستان سبب شده تا شهر‌وندان افغانستان که به تازه‌گی وارد تاجیکستان شدند، با خطر جریمه، بازداشت و اخراج احتمالی به افغانستان روبه‌رو شوند.

کمیساری عالی پناهند‌ه‌گان سازمان ملل از حکومت تاجیکستان خواسته است که از اخراج اجباری پناه‌جویان افغانستان به این کشور خودداری کند و «فوراً مراحل اقامت قانونی و تعیین وضعیت پناهنده‌گی» را از سر بگیرد.  

به تازه‌گی کمیساری عالی پناهنده‌گان سازمان ملل، «توصیه جهانی برای عدم اخراج اتباع افغانستان» را نشر کرد که در آن خواستار جلوگیری از اخراج اجباری همه اتباع افغانستان از کشورهای دیگر شده بود. 

از دید این نهاد، اخراج اجباری شهروندان افغانستان در شرایط کنونی نقض جدی قوانین بین‌المللی است. 

گفتنی است که در جریان سال‌های گذشته، شمار زیادی از شهروندان افغانستان که قصد سفر به کشورهای غربی دارند، با مهاجرت به تاجیکستان، در دفترهای کمیساری عالی پناهنده‌گان سازمان ملل، پرونده مهاجرتی باز کرده‌اند.

دکمه بازگشت به بالا