ترتیب نام‌های نامزدان انتخابات ریاست جمهوری مشخص شد

۸صبح، کابل: کمیسیون مستقل انتخابات، مراسم قرعه‌کشی ترتیب نام‌های نامزدان انتخابات ریاست جمهوری در برگه‌های رأی‌دهی را برگزار کرد. 
حوا علم نورستانی، رییس کمیسیون مستقل انتخابات روز پنج‌شنبه، پنجم حمل گفت که نماینده‌گان با صلاحیت نامزدان انتخابات ریاست جمهوری، در مراسم ترتیب نام‌های نامزدان حضور داشته‌اند و کمیسیون با بی‌طرفی کامل، این پروسه را انجام داده است. 
بر اساس قرعه‌کشی کمیسیون مستقل انتخابات، به ترتیب نام‌های رحمت‌الله نبیل، سید نورالله جلیلی، فرامرز تمنا، شیدامحمد ابدالی، احمدولی مسعود، نوررحمان لیوال، احمدشهاب حکیمی، محمداشرف غنی، عبدالله عبدالله، محمدحکیم تورسن، گلبدین حکمتیار، عبداللطیف پدرام، نورالحق علومی، محمدابراهیم الکوزی، غلام فاروق نجرابی، عنایت‌الله حفیظ، محمدحنیف اتمر و زلمی رسول در برگه‌ی رأی‌دهی انتخابات ریاست جمهوری پیش‌رو، گنجانیده شده است. 
قرار است انتخابات ریاست جمهوری، به تاریخ شش میزان سال جاری برگزار شود. هجده تن، برای به دست آوردن کرسی ریاست جمهوری، به رقابت می‌پردازند.

Comments are closed.