اتحادیه اروپا با افغان‌ها و کشورهای همسایه‌ افغانستان یک‌ میلیارد یورو کمک می‌کند

۸صبح، کابل: هیأتی از اتحادیه اروپا در سفرش به تاجیکستان اعلام کرده است که یک میلیارد یورو را به افغان‌ها و کشورهای همسایه افغانستان کمک می‌کند.

به گزارش خبرگزاری خاور، این موضوع را اوتا اورپیلینن، کمیسار این اتحادیه در امور همکاری‌های بین‌المللی روز دوشنبه، یکم قوس در شهر دوشنبه، پایتخت تاجیکستان مطرح کرده است.

این مقام اتحادیه اروپا در سفرش به تاجیکستان، با سراج‌الدین مهرالدین، وزیر امور خارجه این کشور در مورد افغانستان دیدار و گفت‌وگو کرده است.

در همین حال، جوزف بورل، مسوول سیاست خارجی اتحادیه اروپا در توییتی گفته است که این اتحادیه در پی تحکیم روابط با کشورهای آسیای مرکزی است.

بورل افزود: «رئیس جمهور رحمان ما را برای گفت‌وگوی آزاد در مورد مسایل دوجانبه و هم‌چنان مسایل افغانستان، از جمله چالش‌های تاجیکستان به عنوان همسایه مستقیم این کشور، دعوت کرد.»

 او گفته است که اتحادیه اروپا با ایجاد دولت فراگیر در افغانستان موافق است.

از سویی هم، اوتا اورپیلینن، کمیسار این اتحادیه در امور همکاری‌های بین‌المللی در دیدارش با وزیر امور خارجه تاجیکستان، گفته است که بخش اول این کمک ۳۰۰ میلیون یورو را در برمی‌گیرد.

به گفته او، این کمک بدون به رسمیت شناختن طالبان و دخالت نهادهای دولتی آنان، به مردم افغانستان در داخل و خارج از این کشور صورت می‌گیرد.

 این مقام اتحادیه اروپا، گفته است که  ۹۱ میلیون یورو در زمینه توسعه همکاری‌های دوجانبه، با تاجیکستان کمک می‌شود.

پیش از این، اتحادیه اروپا اعلام کرده بود که برای کمک به مردم افغانستان و آواره‌گان این کشور در کشورهای همسایه آن، کمک مالی می‌کند.

گفتنی است که افغانستان در حال حاضر با بحران بشری روبه‌رو است و به همین دلیل، روزانه ده‌ها هزار نفر وارد کشورهای همسایه می‌شوند تا بتوانند به کشورهای اروپایی بروند.

دکمه بازگشت به بالا