نیروهای مرزی تاجیکستان در نقاط مرزی تخار مانور نظامی برگزار کردند
۸صبح، تخار: منابع محلی در تخار می‌گویند که نیروهای مرزی تاجیکستان در نقاط مرزی با افغانستان، در نزدیکی ولسوالی «آی‌خانم» این ولایت مانور نظامی برگزار کرده‌اند.
به گفته منابع این مانور نظامی روز جمعه، ۸ دلو، در نقاط مرزی افغانستان انجام شده است.
یک منبع موثق به روزنامه ۸صبح می‌گوید که نیروهای مرزی تاجیکستان در این مانور نظامی از سلاح‌های سبک و سنگین استفاده کرده‌اند.
چندی پیش نیز کشورهای عضو «پیمان امنیت جمعی» در نزدیکی مرزهای افغانستان مانور مشترک نظامی برگزار و هدف آن را مقابله به گروه‌های هراس‌افگن به‌ویژه داعش عنوان کردند.
گفتنی است که پیش از این نیز نیروهای مرزی تاجیکستان در نزدیکی ولسوالی‌های مرزی بدخشان مانور نظامی برگزار کرده بودند.
