سویدن ۱۲۴ هزار دوز واکسین استرازنکا به افغانستان کمک کرد
۸صبح، کابل: وزارت صحت عامه کشور اعلام کرده است که کشور سویدن ۱۲۴ هزار دوز واکسین استرازنکا را به این وزارت کمک کرده است.
وزارت صحت عامه با نشر اعلامیه‌ای گفته است که این محموله واکسین، عصر روز پنج‌شنبه، هفتم اسد، به وزارت صحت عامه تسلیم داده شده است.
این وزارت گفته است که قرار است روند تطبیق این واکسین سر از روز شنبه، نهم اسد، آغاز شود.
به گفته وزارت صحت عامه، این واکسین به افرادی که دوز اول واکسین استرازنکای هندی را دریافت کرده‌اند، تطبیق می‌شود.
مسوولان وزارت صحت عامه ضمن قدردانی از این کمک سویدن گفته‌اند که این کمک در راستای مبارزه با ویروس کرونا موثر واقع می‌شود.
بربنیاد معلومات وزارت صحت عامه، قرار است که در آینده نزدیک دو محموله دیگر واکسین استرازنکا از کمک‌های «کوواکس» به افغانستان برسد.
