طالبان در غزنی موترهای شخصی را به‌نام دولتی مصادره می‌کنند
۸صبح، غزنی: منابع محلی در ولایت غزنی می‌گویند که طالبان در این ولایت موترهای شخصی مردم را به‌نام موتر دولتی مصادره می‌کنند.
منابع محلی در ولسوالی جاغوری غزنی افراد طالبان را به باج‌گیری از مردم متهم کرده و می‌گویند که ده‌ها عراده موتر شخصی باشنده‌گان این ولسوالی از سوی طالبان به‌نام موتر دولتی مصادره شده است.
به گفته منابع، طالبان روز گذشته ۳۰ عراده موتر شخصی مردم را به‌نام موتر دولتی مصادره کرده‌اند.
منابع می‌گویند که طالبان شب‌هنگام وارد خانه‌های مردم شده و دست به مصادره موترها می‌زنند.
پس از تسلط طالبان بر افغانستان، شهروندان همواره از افزایش فعالیت‌های خودسر افراد این گروه شکایت می‌کنند.
