عمران خان: مذاکره با طالبان را برای تشکیل دولت فراگیر با شمولیت تاجیک‌ها، هزاره‌ها و اوزبیک‌ها آغاز کردم

۸صبح، کابل: عمران خان، نخست‌وزیر پاکستان، روز شنبه، بیست‌وهفتم سنبله، اعلام کرد که پس از مذاکرات با رهبران همسایه افغانستان به‌ویژه گفت‌وگو با امام‌علی رحمان، رییس جمهور تاجیکستان، رای‌زنی را با طالبان آغاز کرده است.

خان در توییتی نوشته است که گفت‌وگو با طالبان برای تشکیل یک دولت فراگیر با شمولیت تاجیک‌ها، هزاره‌ها و ازوبیک‌ها را آغاز کرده است.

به گفته عمران خان، پس از ۴۰ سال درگیری، حکومت فراگیر صلح و ثبات افغانستان را تضمین می‌کند که نه‌تنها به نفع این کشور، بلکه به نفع همه منطقه است.

عمران‌خان جزییات بیش‌تر درباره این مذاکرات نداده است.

نخست‌وزیر پاکستان در جریان سفر به دوشنبه، پایتخت تاجیکستان، برای شرکت در نشست رهبران سازمان همکاری‌های شانگهای، با امام‌علی رحمان دیدار کرد. او در یک نشست خبری مشترک با رحمان اعلام کرد که یکی از مسایلی که پاکستان و تاجیکستان را نگران کرده است، درگیری بین تاجیک‌ها و طالبان در پنجشیر است.

خان گفت: «در این دیدار ما توافق کردیم که جناب عالی امام‌علی رحمان از طرف تاجیک‌ها و ما به نماینده‌گی از پشتون‌ها یا طالبان تلاش‌های لازم را انجام خواهیم داد تا مسأله پنجشیر از طریق گفت‌وگو حل‌و‌فصل شود.»

امام‌علی رحمان در این نشست تأکید کرد که باید مساله پنجشیر حل و آتش‌بس اعلام شود. رحمان تأکید کرد که راه‌های اعزام کمک‌های بشردوستانه به پنجشیر باز شود. رییس جمهور تاجیکستان برای میزبانی از گفت‌وگوهای بین‌الافغانی اعلام آماده‌گی کرد.

دکمه بازگشت به بالا