امام علی رحمان در نشست شانگهای: تاجیکستان خواهان ایجاد یک دولت فراگیر در افغانستان است

۸صبح، کابل: امام علی رحمان، رییس جمهور تاجیکستان در نشست سران سازمان همکاری‌های شانگهای گفته است که خواهان تشکیل دولت فراگیر در افغانستان است و ایجاد هرنوع سیستم بدون در نظر گرفتن افکار عمومی، نتایج غیرقابل پیش‌بینی به دنبال خواهد داشت.

نشست شانگهای امروز جمعه، بیست‌وششم سنبله، در غیبت افغانستان برگزار شد. به گزارش خبرگزاری دولتی تاجیکستان، خاور، امام علی رحمان، رییس جمهور این کشور در نشست سازمان همکاری‌های شانگهای از جامعه بین‌المللی به ویژه سازمان ملل متحد خواست که تا به مردم افغانستان به ویژه ولایت پنجشیر که نزدیک به دو ماه می‌شود در محاصره قرار دارد، کمک‌های فوری ارسال کند.

رحمان در جمع سران این سازمان خاطرنشان کرد که تروریسم بین‌المللی، افراط‌گرایی، جدایی طلبی، جنایت‌های سازمان یافته فراملی، از جمله قاچاق مواد مخدر، جرایم سایبری تهدیدهای اصلی برای امنیت در منطقه و کشورهای عضو سازمان همکاری‌های شانگهای هستند.

نشست شانگهای بیش از ۱۵ کشور اشتراک کرده‌اند.

نارندرا مودی، نخست‌وزیر هند، قاسم جومارت توقایف، رییس جمهور جمهوری قزاقستان، شی‌جین پینگ، رییس جمهور چین، سادیر جپاراف، رییس جمهور قرغیزستان، عمران خان، نخست‌وزیر پاکستان، ولادیمیر پوتین، رییس جمهور فدراسیون روسیه و شوکت میرضیایف، رییس جمهور اوزبیکستان، سران کشورهای ناظر سازمان همکاری شانگهای، از جمله الکساندر لوکاشنکو، رییس جمهور بلاروس، ابراهیم رییسی، ریس جمهور ایران، اوخنااگیین خورلسوخ، رییس جمهور مغولستان، قربانقلی بردی محمداف، رییس جمهور ترکمنستان به عنوان مهمان افتخاری در این نشست به صورت آنلاین و حضوری شرکت کرده بودند.

سال‌های گذشته افغانستان نیز در این نشست حضور داشت، اما امسال با تصرف کابل توسط طالبان نماینده‌ای از افغانستان حضور نداشتند.

دکمه بازگشت به بالا