امام‌علی رحمان و عمران خان درباره افغانستان گفت‌وگوی تلفنی کردند

۸صبح، کابل: عمران خان، نخست‌وزیر پاکستان، طی یک تماس تلفنی با امام‌علی رحمان، رییس جمهور تاجیکستان، درباره وضعیت افغانستان گفت‌وگو کرده است.

  این تماس تلفنی روز شنبه، دهم میزان، صورت گرفته است.

دفتر ریاست جمهوری تاجیکستان اعلام کرده‌ است که در این تماس تلفنی رییس جمهور رحمان و نخست‌وزیر خان در زمینه منطقه با تأکید بر وضعیت افغانستان گفت‌وگو کرده‌اند.

 امام‌علی رحمان گفته است که وضعیت افغانستان هم‌چنان در مرکز توجه تاجیکستان است؛ زیرا همه رویدادهایی که در این کشور رخ می‌دهد، بر وضعیت امنیت منطقه به‌طور کلی تأثیر مستقیم دارد.

رییس جمهور تاجیکستان تأکید کرده است که ایجاد گفت‌وگوی جامع بین نیروهای مختلف یکی از عوامل مهم برای بازگرداندن صلح و ثبات در افغانستان است. او آماده‌گی کشورش برای همکاری با همه اطراف در این روند را اعلام کرده است.

 طبق اعلام دفتر نخست‌وزیر پاکستان، عمران خان و امام‌علی رحمان بر اهمیت آشتی ملی در افغانستان تأکید کرده‌اند.

 خان گفته است که نیازهای بشردوستانه مردم افغانستان به‌صورت فوری رفع شود و جامعه بین‌المللی به این مردم کمک کند.

نخست‌وزیر پاکستان هم‌چنان بر اهمیت فوری مشارکت اقتصادی با افغانستان برای جلوگیری از بحران اقتصادی و تسکین رنج‌های مردم تأکید کرده‌ است.

خان و رحمان توافق کرده‌اند که تماس‌های‌شان در این مورد را ادامه دهند.

عمران ‌خان که در بیست‌وششم سنبله به دوشنبه، پایتخت تاجیکستان، برای شرکت در نشست سران سازمان همکاری‌های شانگهای رفته بود، نیز با امان‌علی رحمان در مورد افغانستان رای‌زنی کرد. خان تأکید کرده بود که بین تاجیکان افغانستان و طالبان آشتی می‌کند. او پس از این سفر اعلام کرد که مذاکرات خود برای شامل کردن تاجیک‌ها، هزاره‌ها و اوزبیک‌ها را با طالبان آغاز کرده است.

از جانب دیگر، تنش‌ها بین طالبان و تاجیکستان، روسیه را نگران کرده است. طالبان اخیراً تاجیکستان را به مداخله در امور افغانستان متهم کرده‌اند.

دکمه بازگشت به بالا