معاون فرمانده قول‌اردوی ۲۱۷ عمری طالبان: در یک هفته تاجیکستان را تسخیر می‌کنیم
۸صبح، تخار: منابع محلی در ولایت تخار می‌گویند که معاون فرمانده قول‌اردوی ۲۱۷ عمری طالبان گفته است که نیروهای آنان قادر‌ند در یک هفته کشور تاجیکستان را تسخیر کنند.
منابع روز سه‌شنبه، ۱۱ اسد، می‌گویند که ملا جان‌محمد حمزه، مشهور به ملا جانو، معاون قول‌اردوی ۲۱۷ عمری طالبان در ولایت تخار، گفته است که نیروهای آنان قادر‌ند در یک هفته تاجیکستان را تسخیر کنند.
او این سخنان را روز گذشته در حضورداشت وزیر امر به معروف و نهی از منکر طالبان که به تخار سفر کرده بود، بیان کرده است.
معاون قول‌اردوی عمری طالبان به تاجیکستان هشدار داده و افزوده است، در صورتی که این کشور دست از «مداخله‌ها در امور داخلی افغانستان نکشد و روسیه پشت تاجیکستان قرار نگیرد»، این کشور را ظرف یک هفته تسخیر می‌کنند.
گفتنی است که ملا جان‌محمد حمزه در سقوط ولایت تخار نقش برجسته داشت.
او تنها فرمانده پشتون‌تبار است که به کشور تاجیکستان هشدار داده است.
